ପ୍ରଦୀପ ମାଝି
(Best in ପୂର୍ବତନ ସାଂସଦ)
ଭାରତୀୟ ଜାତୀୟ କଂଗ୍ରେସର ଜଣେ ସୁସଂଗଠକ ଭାବେ ଯାହାର ନାଁ ଖାଲି ଓଡ଼ିଶା କାହିଁକି, ଓଡ଼ିଶା ବାହାରେ ମଧ୍ୟ ବେଶ୍ ପରିଚିତ, ସେ ହେଉଛନ୍ତି ପୂର୍ବତନ ସାଂସଦ ପ୍ରଦୀପ ମାଝି। ଆଦିବାସୀ ଅଂଚଳରେ ଦଳକୁ ସଂଗଠିତ କରି ରଖିବା ସହ ବିଭିନ୍ନ ପ୍ରସଙ୍ଗରେ ସାଧାରଣ ଜନତାଙ୍କୁ ଏକାଠି କରି ସରକାରଙ୍କ ବିରୁଦ୍ଧରେ ଶାଣିତ ସ୍ୱର ଉଠାବାରେ ସେ ହେଉଛନ୍ତି ସିଦ୍ଧହସ୍ଥ।ଶାସନ ଗାଦିରେ ଯେଉଁ ଦଳ ଥାଉ ନା କାହିଁକି, ସଂସଦରେ ପ୍ରଶ୍ନ ପଚାରିବା ହେଉଛି ଜଣେ ସାଂସଦର ଧର୍ମ। ଆଉ ଏହି ଧର୍ମକୁ ସଠିକ ପାଳନ ଭାବେ ପାଳନ କରିପାରିଛନ୍ତି ଶ୍ରୀଯୁକ୍ତ ମାଝି। ୨୦୦୯ ମସିହାରେ ପ୍ରଥମ ଥର ପାଇଁ ନବରଙ୍ଗପୁର ସଂସଦୀୟ ଆସନରୁ ଲୋକସଭାକୁ ନିର୍ବାଚିତ ହେବା ପରେ ପ୍ରଥମ ୨ ବର୍ଷ ମଧ୍ୟରେ ସଂସଦରେ ସେ ପଚାରିଥିଲେ ୫୦୧ଟି ପ୍ରଶ୍ନ, ଯାହା ଏକ ରେକର୍ଡ ବୋଲି ପ୍ରତିଷ୍ଠିତ ସମ୍ୱାଦ ପତ୍ରିକା ଟାଇମ୍ସ ମ୍ୟାଗାଜିନ୍ ଉଲ୍ଲେଖ କରିଥିଲା।
୧୯୭୬ ମସିହା ଫେବ୍ରୁୟାରୀ ୨୨ ତାରିଖରେ ଆଦିବାସୀ ଅଧ୍ୟୁଷିତ ନବରଙ୍ଗପୁର ଜିଲାର ଝରିଗାଁରେ ଜନ୍ମିତ ଶ୍ରୀଯୁକ୍ତ ମାଝି ଉଚ୍ଚଶି କ୍ଷାଲାଭ ପରେ ରାଜନୀତି ଆଡକୁ ମୁହାଁଇଥିଲେ । ୨୦୦୨ ମସିହାରେ ନବରଙ୍ଗପୁର ଜିଲାରେ ଅପପୁଷ୍ଟିରେ ଶିକାର ଶିଶୁମାନଙ୍କ ପ୍ରସଙ୍ଗକୁ ଉତ୍ଥାପନ କରି ସେ ଚର୍ଚ୍ଚାର ପରିସରକୁ ଆସିଥିଲେ। ଭୁବନେଶ୍ୱରରେ ଯୁବ କଂଗ୍ରେସ ପକ୍ଷରୁ ଆୟୋଜିତ ଟ୍ୟାଲେଣ୍ଟ ସର୍ଚ୍ଚ ଫର ୟୁଥ୍ କାର୍ଯ୍ୟକ୍ରମରେ ସେ ପ୍ରଥମସ୍ଥାନ ଅଧିକାର କରିବା ପରେ ସେତେବେଳର କଂଗ୍ରେସ ଉପସଭାପତି ରାହୁଲ ଗାନ୍ଧୀଙ୍କ ଦୃଷ୍ଟି ଆକର୍ଷଣ କରିବାରେ ସଫଳ ହୋଇଥିଲେ। ଏହା ପରେ ସେ କଂଗ୍ରେସରେ ଯୋଗଦେଇଥିଲେ ଓ ୨୦୦୭ ମସିହାରେ, ମାତ୍ର ୩୨ ବର୍ଷ ବୟସରେ ସେ ହୋଇଥିଲେ ନବରଙ୍ଗପୁର ଜିଲା ପରିଷଦ ଅଧ୍ୟକ୍ଷ। ସାଂଗଠନିକ ଦକ୍ଷତା ଯୋଗୁ ତାଙ୍କୁ ମିଳିଥିଲା ଯୁବ କଂଗ୍ରେସର ଜାତୀୟ ସମ୍ପାଦକ ପଦବୀ। ଏପରି ପଦବୀ ଅଧିକାର କରିବାରେ ଶ୍ରୀ ମାଝୀ ହେଉଛନ୍ତି ପ୍ରଥମ ଓଡ଼ିଆ।
୨୦୦୯ ମସିହାରେ ଅନୁଷ୍ଠିତ ସାଧାରଣ ନିର୍ବାଚନରେ ନବରଙ୍ଗପୁର ସଂସଦୀୟ ଆସନରୁ ସେ ଲୋକସଭାକୁ ନିର୍ବାଚିତ ହୋଇଥିଲେ। -୨୦୧୪, ୨୦୧୯ ନିର୍ବାଚନରେ ଯଦିଓ ସେ ପରାଜୟ ବରଣ କରିଛନ୍ତି, ତଥାପି ମନୋବଳ ଆଜି ବି ଅଛି ସେମିତି ମଜବୁତ୍। ସଭା ସମିତି, ଆନ୍ଦୋଳନ, ହରାତାଳ ଜରିଆରେ ସେ ତୁଳାଉଛନ୍ତି ଦାୟିତ୍ବବାନ ବିରୋଧୀ ନେତାର ଗୁରୁଦାୟିତ୍ବ। ସମ୍ପ୍ରତୀ ଶ୍ରୀ ମାଝି ଓଡ଼ିଶା ପ୍ରଦେଶ କଂଗ୍ରେସ କମିଟିର କାର୍ଯ୍ୟକାରୀ ସଭାପତି ଦାୟିତ୍ବ ତୁଲାଉଛନ୍ତି।